Saturday, August 8, 2015
MCHUNGAJI ABDILI DINI NA KULIFANYA KANISA KUWA MSIKITI NCHINI NIGERIA .
Mchungaji mmoja nchini Nigeria sanjari na kuligeuza kanisa lake kuwa
msikiti, ametamka shahada mbili na kuwa mfuasi wa dini Tukufu ya
Kiislamu.
Adekunle Afolabi ambaye amesilimu na kuwa Mwislamu anasema
kuwa, amechukua uamzi huo baada ya kuota ndoto ya maajabu wakati
alipokuwa katika maandalizi ya kufanya sherehe za kila mwaka za tangu
kuasisiwa kanisa lake hilo lililokuwa likiitwa Apata Adura Cherubim
katika mji wa Ado Ekiti jimbo la Ekiti. Kwa mujibu wa Afolabi ambaye kwa
sasa anaitwa kwa jina la Alfa Abubakar Afolabi, akiwa usingizini,
alijiwa na mtu aliyekuwa amevalia mavazi meupe, alimkinaisha kwamba dini
ya Kiislamu ndio dini pekee inayoweza kumuokoa mwanadamu na kumfikisha
peponi. Afolabi mwenye umri wa miaka 45, aliasisi kanisa lake hilo miaka
mitano iliyopita. Anasema kuwa, tangu alipokuwa na umri wa miaka 25
alikuwa akijishughulisha na shughuli za uhubiri wa dini ya Kikristo na
kusisitiza kuwa, kuanzia sasa ameamua kubadili dini na kuwa Mwislamu na
kwamba atafariki dunia akiwa katika dini hiyo. Baada ya kuligeuza kanisa
hilo na kulifanya kuwa msikiti, Afolabi amemteua sheikh mmoja wa mji
huo kuendesha ibada za Kiislamu eneo hilo huku yeye akijikita katika
kujifunza mafundisho ya dini ya Kiislamu hususan Qur’an Tukufu. Nigeria
ni nchi yenye watu milioni 140 ambapo Waislamu ni asilimia 55 huku
Wakristo wakiunda asilimia 40 ya raia hao. Katika baadhi ya maeneo jamii
za Waislamu na Wakristo zinaishi kwa amani na ushirikiano, huku katika
maeneo mengine zikiishi kwa mivutano inayotokana na migogoro ya kikaumu
na kidini ambayo inasababishwa na watu wenye misimamo ya kufurutu ada.
CHANZO:SAUTI YA TEHRANI
CHANZO:SAUTI YA TEHRANI
